আমি ক্ৰয় কৰা 16GB Internal Memory বুলি লিখা থকা ম'বাইল ফ'ন এটাত কিয় 16GB ব্যৱহাৰযোগ্য Memory নাপাওঁ?

    SAMSUNG ৰ এণ্ড্ৰইড ম'বাইল এটা কিনিছিলো। কিনোতে দোকানীয়ে কৈছিল,"এই ফ'নটোত 16GB Internal Memory আছে, আপুনি
External Memory ব্যৱহাৰ নকৰাকৈয়ে বহুত ছেল্‌ফি তুলিব পাৰিব।" কিন্তু কেইদিনমানৰ পাছতে ফ'নটোৱে সতৰ্ক বাণী শুনাই আছে যে, আপুনি 8.9GB তকৈ অধিক মেমৰী ব্যৱহাৰ কৰিব নোৱাৰে।

    তাৰমানে মোক দোকানীয়ে ঠগিলে নেকি? নাই, দোকানীয়ে ঠগা নাই। ফ'নটোৰ লগত অহা বাকচটোতো দেখোন লিখা আছে 16GB Internal Memory. তেন্তে 8.9GB হে মই ব্যৱহাৰ কৰিব পাইছো কিয়? ক'ত গ'ল বাকীখিনি? এনেধৰণৰ বহুতো প্ৰশ্ন হয়তো আমাৰ প্ৰত্যেকৰে মনলৈ এবাৰ হ'লেও নহাকৈ থকা নাই। তেন্তে কিয় এনেকুৱা হয়?

    ইয়াৰ কাৰণটো হ'ল, ফ'ন মেকাৰ বা মেমৰী কাৰ্ড মেকাৰ কোম্পানীবোৰে মেমৰী কাৰ্ড বনাওঁতে তেওঁলোকৰ সুবিধাৰ্থে 1GB=1000MB হিচাপে গণ্য কৰে। যিটো আচলতে আমাৰ কম্পিউটাৰ বা ম'বাইল ফ'ন নতুবা ছফ্‌টৱেৰৰ Binary হিচাপত 1GB=1024 MB হ'ব লাগে।

    গতিকে, 16 GB বুলি লিখা সাধাৰণ মেমৰী কাৰ্ড এখনত আমি ম'বাইল ফ'ন, কম্পিউটাৰ নতুবা ছফ্‌টৱেৰৰ হিচাপত আমি 15.6GB মানহে ব্যৱহাৰ কৰিবলৈ পাওঁ। যিহেতু মেমৰী কাৰ্ড মেকাৰসকলৰ হিচাপত 16GB=16000MB, যিটো কম্পিউটাৰৰ হিচাপত 16000MB ৰ মেমৰীখন হয়গৈ 15.6GB (16000/1024).

      অৰ্থাৎ মেমৰী কাৰ্ড মেকাৰসকলে মেমেৰীৰ Capacity ৰ হিচাপক দশমিক সংখ্যাৰ ভিত্তিত নিৰূপণ কৰে, তেওঁলোকৰ সুবিধাৰ্থে। আৰু কম্পিউটাৰ বা ছফ্‌টৱেৰে হিচাপ কৰা পদ্ধতিটো Binary একক পদ্ধতি।

    ইয়াৰোপৰি 16GB Internal Memory থকা ফ'নটোত 8.9GB হে ব্যৱহাৰোপযোগী মেমৰী Capacity থকা কথাটোৰ লগত আন কিছুমান কথা জড়িত হৈ আছে।

• প্ৰথমতে, যিহেতু মেমৰী কাৰ্ড মেকাৰসকলে 16GB=16000MB হিচাপে গণ্য কৰে, সেয়ে ইয়াৰ প্ৰকৃত Capacity হ'ল 15.6GB.
• দ্বিতীয়তে, আমাৰ ম'বাইল ফ'নবোৰত একোটাকৈ Operating System install কৰা থাকে। এই Operating System বোৰ ম'বাইল ফ'নৰ Internal Memory তেই install কৰা থাকে বা সাধাৰণ অৰ্থত ছেভ কৰা থাকে। গতিকে 15.6GB Capacity থকা মেমৰী কাৰ্ডখনৰ এটা অংশ Operating System টোৰ বাবে সুকীয়াকৈ ৰাখি থোৱা হয়।

      গতিকে 15.6GB ৰ পৰাও কমি গৈ ব্যৱহাৰ কৰোঁতাজনৰ বাবে ব্যৱহাৰোপযোগী মেমৰী Capacity 8.9GB হে ৰয়গৈ।

      16GB Internal Memory থকা বেলেগ বেলেগ কোম্পানীৰ বেলেগ বেলেগ ম'ডেলৰ ফ'নবোৰৰ প্ৰত্যেকৰে ব্যৱহাৰোপযোগী মেমৰী Capacity বেলেগ বেলেগ ধৰণৰ হ'ব পাৰে। এইটো নিৰ্ভৰ কৰে ফ'নটোত কেনেধৰণৰ Operating System install কৰা আছে।