কৃত্ৰিম বুদ্ধিমত্তা আৰু মানুহৰ ভৱিষ্যত

      বৰ্তমান সময়ত বিজ্ঞান আৰু প্ৰযুক্তিবিদ্যাৰ বিকাশে যিটো পৰ্যায় পাইছেগৈ সেই বিষয়ে আমি সকলোৱেই জ্ঞাত। বৰ্তমান যুগটো যান্ত্ৰিকতাৰ যুগ। মানৱ সমাজে এতিয়া এনেকুৱা এটা অৱস্থাত উপনীত হৈছে, য'ত বিজ্ঞান-প্ৰযুক্তিৰ অবিহনে মানুহে জীৱন-ধাৰণ কৰাটো এক প্ৰকাৰে অসম্ভৱ বুলি
ক'ব পাৰি। ৰাতিপুৱা সাৰ পাই উঠাৰ পৰা ৰাতি শোৱাৰ আগমুহূৰ্তলৈকে আমি প্ৰত্যেকেই বিজ্ঞান-প্ৰযুক্তিৰ বিভিন্ন অৱদানবোৰৰ লগত জড়িত হৈ থাকো।

   বিজ্ঞান-প্ৰযুক্তিৰ তেনে এক অতুলনীয় আৱিষ্কাৰ হ'ল কৃত্ৰিম বুদ্ধিমত্তা বা আৰ্টিফিচিয়েল ইন্টেলিজেন্স বা যাক আমি ৰবট বুলি ক'লে সকলোৱেই বুজি পাওঁ। কৃত্ৰিম বুদ্ধিমত্তা হৈছে কম্পিউটাৰ প্ৰগেমৰ দ্বাৰা পৰিচালিত যন্ত্ৰৰ দ্বাৰা প্ৰদৰ্শিত  বুদ্ধিমত্তা। কৃত্ৰিম বুদ্ধিমত্তা হ'ল কম্পিউটাৰ বিজ্ঞানৰ এটি শাখা, য'ত মানুহৰ বুদ্ধিমত্তা আৰু চিন্তাশক্তিক কম্পিউটাৰৰ দ্বাৰা অনাকৃত কৰাৰ চেষ্টা কৰা হয়।

      কৃত্ৰিম বুদ্ধিমত্তাৰ ব্যৱহাৰ আমি দৈনিক কৰি আছো। আমাৰ ম'বাইলত থকা ভাৰ্চুৱেল ব্যক্তিগত সহকাৰী যেনে- Google Assistant, Cortana, Siri আদিক আমি নিতৌ ব্যৱহাৰ কৰোঁ। বিত্তীয় সেৱাবোৰতো কৃত্ৰিম বুদ্ধিমত্তাৰ ব্যৱহাৰ হৈ আছে। গুগলে নিৰ্মাণ কৰা স্বয়ংচালিত গাড়ীবোৰৰ আঁৰতো আছে কৃত্ৰিম বুদ্ধিমত্তা। আজিৰ যুগত চিকিৎসা সেৱাতো ৰবট ব্যৱহাৰ হৈছে। ফেচবুকত কোনো ব্যক্তিৰ ফটো আপল'ড কৰিলে লগে লগেই সেই ব্যক্তিজনক টেগ কৰিবলৈ সংকেত দিয়া, বতৰৰ আগজাননী দিয়া আদিলৈকে কৃত্ৰিম বুদ্ধিমত্তাই নিজৰ পৰিসৰ বহল কৰিছে।

       কৃত্ৰিম বুদ্ধিমত্তাই মানুহৰ জীৱন-ধাৰণ প্ৰক্ৰিয়াক সহজ কৰি তুলিছে হয়, কিন্তু কৃত্ৰিম বুদ্ধিমত্তাই মানৱ সভ্যতাক ধ্বংস কৰি পেলাব যে নোৱাৰিব তাৰ নিশ্চয়তা নাই।

উদ্যোগ বা ফেক্টৰীবোৰতো কৃত্ৰিম বুদ্ধিমত্তাৰ দ্বাৰা পৰিচালিত ৰবটৰ দ্বাৰা কাম কৰা হয়। যাৰ ফলত ফেক্টৰীত বনুৱাৰ প্ৰয়োজন কমি আহিছে। যিয়ে অদূৰ ভৱিষ্যতে নিবনুৱা সমস্যাতো অধিক ভয়াৱহ হোৱাৰ সম্ভাৱনা আছে।

       অলপতে, ছৌদি আৰৱত বিশ্বৰ প্ৰথমটো মানৱসদৃশ ৰবটক নাগৰিকত্ব প্ৰদান কৰা হৈছে। ৰবটটো হেনছন ৰবটিক্স নামৰ কোম্পানীটোৱে নিৰ্মাণ কৰিছে। যাৰ নাম হ'ল ছ'ফিয়া। ছ'ফিয়াই মানুহৰ লগত বাৰ্তালাপ কৰে, বাৰ্তালাপৰ মাজেৰে মানুহৰ মুখমণ্ডলৰ ভংগিমা পৰ্যবেক্ষণ কৰি মানুহৰ অনুভূতিবোৰ বুজিব পাৰে, মানুহৰ দৰেই অনুভূতিবোৰ অংগী-ভংগিৰে প্ৰকাশ কৰিব পাৰে। মুঠৰ ওপৰত ছ'ফিয়াই মানুহৰ দৰেই সকলো আৱেগ, অনুভূতি, খং আদি প্ৰকাশ কৰিব পাৰে। ছ'ফিয়াই বাৰ্তালাপৰ মাজে মাজে ব্যংগও কৰিব জানে।

      ছ'ফিয়াক এবাৰ ৰবটটোৰ নিৰ্মাতা ড° ডেভিদ হেনছনে কৰা প্ৰশ্নৰ উত্তৰত ছ'ফিয়াই ব্যংগ কৰি কৈছিল,"I will destroy human."

     গতিকে অনাগত ভৱিষ্যতত কৃত্ৰিম বুদ্ধিমত্তাই মানৱ সভ্যতাক ধ্বংস কৰি যে নেপেলাব তাক নিশ্চিতভাৱে কোৱা টান। হয়টো অদূৰ ভৱিষ্যতে হলীউদ ছবিবোৰত প্ৰদৰ্শন কৰাৰ দৰে মানুহৰ বুদ্ধিমত্তা আৰু কৃত্ৰিম বুদ্ধিমত্তাৰ মাজত এক অঘোষিত প্ৰতিযোগিতা হ'ব আৰু এই প্ৰতিযোগিতাত বিজয়ী হোৱা নোহোৱাটোৱেই বিচাৰ কৰিব মানৱ সভ্যতাৰ ভৱিষ্যত।